أن زان لك وقتك تخيّر بالاصحاب
وان شان وقتك كلّهم مايبونك
أن جيتهم قاموا يحدّون الانياب
وان رحت عنهم بالقفا يشذبونك
لا دبّرت دنياك والحظ ما طاب
الناس لامن طحت مايرحمونك
اهل السيوف اللي يقصوّن الارقاب
امّا كفاهم واقعك يظلمونك
لا تامن العقرب ولا تامن الــدّاب
السمْ واحد لا رقى فيْ متونك
ياجاهل الدنيا ودورات الاسباب
اعرف ترى من خان غيرك يخونك
لو كان لك ربعٍ موالينْ واحباب
لابدّهـم عقب الغــلا ينكرونــك
وقتٍ يشيب بالمخاليق ماشاب
اسأل رجـالٍ جرّبـوا يخبـرونـك
واحذر تخاوي كل هافي وكذّاب
اهل الردى بطبوعهم يطبـعونك
ارفع مقامك عن رديين الانساب
لو شفتهم في حضرتك يمدحونك
فارق ثراهم وارق في راس مرقاب
أبعد عن اللي لونهم غيـر لونـك
خلاّنْ مالْ وما لهم ربع واقراب
لآقلْ مـالك عدّهــم يكرهــونـك
أعتاض فيهم من طويلين الاشناب
اللي الآ مـال الدهــر ينفعونــك
لاصكّتك دنياك وافـتــرّ دولاب
بانت مواقفهـم ولا يرخصونــك
هذا رفيقـك من قريبـين واجناب
ذخرك وهم في واجبك يذخرونك
عندك قريبينٍ ولو قلت غيّــاب
على صدى صوتْ النّدى ياصلونك
ياللي سمعت العلم لاتفتح الباب
لاتنحشر في شي ماهوب شونك
ربعك الا من شفتهم صاروا احزاب
وتشاوروا بالراي والعلم دونــك
لاتبـدي برايك عليهم ولو صـاب
لو صحت باعلى الصوت مايسمعونك
ومن لاحسب لك لاتسوّي له حساب
لو كان يسوى وحدةٍ من عيـونك
زابن بن محمد الدوسري
ليست هناك تعليقات:
إرسال تعليق