الشيخه اللي وقتها وقت الظهور
يعني مع الاعلام تظهر وتغبا
لوقال انا شيخ العرب قل انت ثور
وانت تهبا واللي يمجدك يهبا
#مشعل بن سابر
اكـثـر بنـادق ذا الزمـن مـاهي تثور
مثـل الشيوخ اللي شــياختهم وبا
لو يسكنون اقصور يلحقهم قصور
الـمشكـله يـا الـربع جـو كنهم دبا
#مهدي بن مسفر الحبابي
اللي عماه الكبر وطغاه الغرور
ﻻذكره بطيب وﻻطيب نبا
وتشيخته كلبوها له دبور
واﻻ الرجال اتبين ماهي بتغبا
مساعدالوايلي
ان جيت ابا اجاري عريضين النحور
مثل الذي ينطح ذعاذيع الصبا
واكثر شيوخ اليوم لاحقهم غرور
ماظن فيش عراش ياروس الضبا
#مساعد البدراني
يستاهل الشّيخه طويلين الشّبور
اللي نباهم يا هلا يا مرحبا
خل الشّيوخ اللي عزايمها تبور
عند اللوازم . يابرك والاّ حبا
#ماجد بن عبدالله الغامدي
الشيخ والله ماتغيره الدهور
شيخته ساس من على وقت مضا
والي بلاساس مخالف لعبور
قسيمته يازين ستره في الغبا
#عايض المشعلي
الشيخ شيخ الفعل والعلم امخبور
ماهي بالحيت ختم والعين اشهبا
الفرق واضح ياوسيعين الصدور
اشيوخ هذا الوقت ماعنهم نبا
#محمد بن جابر ال فطيح
المشيخه ذَا الوقت صارت في ثبور
وحصانها في دورنا هذله كبا
ذَا الوقت شيخان الدراهم و الظهور
غطوا على الشيوخ الفعايل و الجبا
#احمدصالح السبيعي
الشيخه اللي مالها ساس مخبور
كثرت مثل ماكثر في الناس الربا
ملمعه ! لكن . دبور . في دبور
وتلميعها زود . ل صاحبها الغبا
# ظافر نجر
الشيخ يالجواد في مر العصور
اللي يسد الشان ولفعله نبا
اما شيوخ اليوم بندق ماتثور
وان ثورت بارود ساعه ويغبا
# سعيدمساعدالوادعي
الشيخه الي ساسها كذبن وزور
يوم المهار الصفر ما جاله نبا
راعي ولد راعي ويسرح من سحور
شيخته هذي ذنبها ذنب الربا
#سلطان بن شيبان
شيخة هل الطالة مجبرة الكسور
هل الشداد مروية حد الشبا
لاشك بان العد للبدو مخبور
لو كثرت الذيدان ماهو يجدبا
#عايض بن سمره ال مخلص
المشايخ في زمان المغازي والسبور
يوم يثبت شيخته حد مفتوق الشبا
يومهي بالسيف الاجرد ومخباطٍ يثور
هاذي الشيخة كذا ياعزيزين النبا
#ظافر محمد بن لبده ال فطيح
الشيخه اللي مالها قدم العصور
شداد راعيها ماهو طيب نبا
قدّم وراجع ثم لفا بشهود زور
مع رشوة للي حبى واللي سبا
# سعيد بن هويج ال فطيح
شيخ ع ساس وله في الشان شور
وتعرف مواقيفه رفيع المنسبا
مايستوي بيت بني من دون سور
مع قصر بلقيس المشيد في سبا
#علي_الحمري
حق المشالح مالقى مخرج عبور
وشلون تجار الحساء تاكل ربا
مثل المقابر سورها لجل القبور
ضمت قلال العرف وعزاز النبا
صقر ال هضبان
اللي لهم لاأستصعب الميقاف دور
مقدارهم واضح جهار وفالغبا
وقولو لمن قلدطويلين الشبور
ماشيخ وابن آدم سوا يابوي يبا
#راشد_بن_الشوصاء
بيت الوفاءوالطيب لاشك معمور
والبيت الاخر فيه حنان الدبا
والشيخه اللي من سنه ولاشهور
مثل التجاره في بنوك اهل الربا
فلاح ابن صالح ال فجيحه
ليست هناك تعليقات:
إرسال تعليق