في ذمتي/للشاعر : عبدالله بن شايع الزهيري
في ذمتي اني وافي واني كريم
لو الزمان ارخا علي جنبيته
لكن بلشنا بالعوايل والحريم
وبكل جني راكبٍ جنيته
اسعى وكني عالصراط المستقيم
ويفوح راسي من تحَتْ طاقيته
حكيم واللي مايهرجني حكيم
لاصار هرجه مايخلّص نيته
مايعلم احوال البشر غير العليم
وابليس ماهي تنقطع ذريته
يسريبي الهاجس على الدرب القديم
الجو ظلمى والشعور مبيته
حافي قدم واطا على روس الهشيم
مثل الاسير اللي فقد حريته
والحلم في عيني كما دمعة يتيم
هانة على اصحاب القلوب الميته
ياهملالي ياااااه ياعقل الفطيم
اللي خيااله ماتعـــــدا فيته
راس الملك فرعون تصلاه الجحيم
وبلال فالجنة مع حوريته
وانا بشر واستغفر الله العظيم
عواطفه تغلب على عقليته
احيان اجاوز منطق العقل السليم
لما حمس في خافقي بريته
اللي يغيبّي ليا هب النسيم
وجــريت موالي على قافيته
اصير انا مجنون في عين الغشيم
لنّه يبرهن عن مدى سطحيته
ولىّ الحليم اللي كناها في الصميم
يخفي معاناته ورى شخصيته
والدره اللي دونها البحر الطميم
ماجابها العفوي ولا عفويته
عبدالله بن شايع الزهيري
ليست هناك تعليقات:
إرسال تعليق